Men birdenem goňşumuzyň towuk keteginde özüme geldim. Soňra täzeden uka gitdim. Gözümi açamda ýumşajyk kürsüde täzeje penjegmiň üstüne kofe döken ýaşajyk gyzjagaza käýäp oturkam oýanandygmy bildim. Men oýanandygmy aňşyramsoň birden käýemämi goýdum. Ýere bakyp duran gyzjagaz otagdan çykyp gitdi. Birdenem meň ofisimiň, has dogrusy uly iş binasynyň 19-njy gatynyň penjiresini döwüp içere Piter Parker girdi. Elbetde, roly ýerine ýetirýän her saparky Piter Parkerlerden bu gelen başgaçarakdy. Ol hakyky Piterdi. Howwa. Ol gelip meň bilen salamlaşdy. Aýnany döwüp içere gireninde onun egnini aýna gyýylçaklarynyň biri kesip geçen eken. Men ýarasyna elimi goýup göresim gelýärdi. Şeýle bir isleýärdim. Ýöne ol garşy çykdy. Men bolsa onuň kellesine ýumrugym bilen bir "urgy" berdim. Çaşdy. Soňra ganyna barmagmy degirdim. Näme üçindir şol wagt Piter ümürlendi-de gözümiň öňünden ýok bolup gitdi. Soňra ýangyn söndüriji işgärler meniň oturan otagymyň gapysyny döwüp içere girdiler. Men "Ýangyn barmy?" diýip, olaryň yzy bilen bile giren ýaňky ýaş gyzjagazdan soradym. Olam "Ýok, Odur Budurowiç bular siziň bilen gyssagly ýagdaýda görüşmek islediler. Menem ol şu wagt "işli" diýdim. Bularam, ine, şeýdip içere girdiler" diýdi. Ýangyn söndürijiler "Biz bu ýere batbörek gözläp geldik. Ýaňy bize Wäňkbaýewiň öýünde ýangyn döränligi hakynda habar berdiler. Bizem haýdan-haý batböregmizi aldyk-da ýangyn bolýan öýüň golaýna gelip uçurmaga başladyk. Birdenem asmanda gaýmalap ýören bir samsyk "dört göz" oglan elindäki jadyly taýajygy bilen biziň batböregmizi nyşana alyp bir zatlar diýdi. Şondan soň biziň batböregmiz siziň ofisiňiziň penjiresini döwüp içere girdi. Bize batböregmizi gaýdyp beriň. Biz oýnumyza dowam etmeli. Wagtymyz çäkli. Günortanlyk arakesmede Wäňkbaýewiň öýüni söndürip, ýene şol ýerde arakesme gutaransoň oýnumyza dowam etmeli" diýdiler.

Men olara bar zady düşündürdim. Olar ynanmadylar. Batbörekleri bilen Piter Parkeriň arasynda dag bilen deňiz ýaly tapawut bardygyny aýtdylar. Soňra olaryň içlerinden biri "Men häzir ony alyp geleýin!" diýip, Piteriň gelen ýerinden, äpişgeden özüni ýere oklady-da 10 minut geçenden soň Şerlok Holms bilen bilelikde ofis otagymyň gapysyndan içeri girip geldi. Şerlok maňa garap "Syçanlar haçan pişikler bilen itler hakda gybat edýändiklerini bilýäňmi?" diýdi. Men bolsa "Ýok" diýdim. Samsyk Holms "Bu günäkär. Sebäbi, ol, Täze ýyl arçasyny bezänlerinde iň depesine ýyldyzjyk goýulanok diýip aýtdy" diýdi. Soňam ol döwülen penjireden bökdi. Bökmezinden öňürtem "Muň günäkärdigine hemmäňiz şaýat. Sebäbi bu hemmäň gözüniň öňünde arça bezeginiň esasy kanuny bozjak jümleleri aýtdy ahyryn" diýdi. Soň ýangynsöndürijileriň biri meniň sag aýagymyň dabanyndan tutup ýere serip, penjiräň golaýna süýräp eltip, zyňyp goýberdi. Men ýere patlap düşdim. Soňra bulutlaryň üstünde oýandym. Ýanymda bir oglanjyk uçup barýardy. Men ondan "Ýangyn söndürüjileriň batböregini ýoklan oglan, sen, şolmy?" diýip soradym. Ol "Ýok" diýdi. "Seni aldadylar, nähak töhmet bilen penjireden atyldyň" diýdi. Men bolsa bilýänligmi aýtdym. Barynada Holmsyň samsyklygy sebäp boldy diýibem sözümiň üstüne goşdym. Oglanjyk howada pyrlandy. Hezil edip güldi. Iň uly günäkär Holms däl-de goňşymyň towuk ketegidigni aýtdy. Soňra men ondan kimdigini soradym. "Piter" diýdi. Ýöne kerep bilen uçýan Piter däl-de Piter Pändygny aýtdy. Ondan nirä barýanlygymyzy soradym. "Meň Jennetime!" diýdi. Biz ýyldyzyň içine girdik...

Edepli Gödek.