Gözüň ünjüsini ýürege goýduň,
Şonda asman ýa goňrasdy ýa, sary.
– Arada düýşüme giripsiň – diýdiň
Katdyň ýaýa meňzeş, eliň hasaly.
Öz-özüňden ynjan ýaly gyýylyp,
Sen öz sözleriňe tisgindiň naçar.
Gussamy gizledim. Diýdim: "Söýülip
ýigit bar ömrüni nowjuwan ýaşar".
Şo pursat özümem ynandym şuňa:
Mydam ýaş gezerin, gezerin jahyl.
Ýüregmiň owsunşy galar bolşuna,
Ýigdelerin daňlar çyzylan çagy.
Ýöne biraz sust geçirin gyşlarmy,
Toýlarda syçyrap gözüňe ilmen.
Seniňem şapak deý ýylgyryşlarňy,
Owadan baharlar gaýtalap bilmez.
Bu ünji bedene ornaşar assa,
Köňlüme ýazylar güýz gyrawy deý.
Hem igenç eşderin bulara üsse,
– Indi sen eşigiň ýylyragyn geý.
Ine, onsoň saňa meňzeş bir agşam,
Hol meýdanda gezip gysylyp gerden.
Telwasym gaýdyşar, joşum durugşar,
Hem ýeke gije-de garraryn birden.
Ýürek bir zat syzyp, ýetişip daňa,
Öýňüzden çykanda umyt mysaly.
Ýagşy niýet bolup duşaryn saňa,
Katdym ýaýa meňzeş elim hasaly.
Mämmetnazar Babanazarow
Teswirler (4)
Teswir ýazmak üçin hasabyňyza giriň