@Mary aga ýatlatdy,sagbolsun. Şu goşgy şanly Garaşsyzlygymyz hakynda ýazylan ilkinji goşgy "Garaşsyz". A.Atabaýewiň galamyna degişli. Ýatan ýeri ýagty bolsun.
🌿
Goý, güller açylsyn sähraň ýüzünde,
Asmanam, goý, rahmet nuruny saçsyn.
Müň dokuz ýüz togsan biriň güýzünde
Türkmenistan—ata mekan Garaşsyz!
🌿
Dünýäň kartasyna türkmeniň ýurdy
Täze kürtäň keşdesi deý ýaraşsyn.
Daglaryň arslany, çölleriň gurdy —
Türkmen, bu gün gadym ýurduň
Garaşsyz!
🌿
Türkmen aga, telpegiňi göge zyň,
Gyňaçlaram baýdak kimin parlaşsyn.
Aýdym aýdyň, at çapdyryň, saz çalyň,
Türkmenistan — ata ýurdum Garaşsyz!
🌿
BOLMADY.
🕊
Çöwrüp geýäýmeseň indi dünýäni,
Düzüw ýüz-ä geýer ýaly bolmady.
Bir gidäýseň umyt bilen ýaýdanman,
Soň öwrülip geler ýaly bolmady.
🕊
Deňizler-ä galkdy, joşdy derýalar,
Kimler saga, kimler sola barýarlar,
Aglasaň gülýäler, gülseň urýarlar,
Aglar ýaly, güler ýaly bolmady.
🕊
Dünýäň özem aljyraýar şu günler,
Kine doly, kitüw doly göwünler,
Şeýlebir çiglidip, çigen düwünler,
Çapaýmasaň çözer ýaly bolmady.
🕊
Derdimiz kän haýsy birin aýdaýyn,
Dünýä! Senkiden-ä kyn men ýagdaýym,
Seni munda goýup gidip arkaýyn,
Umyt bilen öler ýaly bolmady.
🕊
Atamyrat ATABAÝEW
Türkmenistanyň halk ýazyjysy

Teswirler (4)
Teswir ýazmak üçin hasabyňyza giriň