Gel, bir düýşi paýlaşaly ikimiz, 

Älem şar garaňka boýalan wagty. 

Küýsegimiz bolsun agyr ýükümiz, 

Asman merjenleri saçanda ýagty. 

 

Gaýdanyňy ýassygyňam duýmasyn, 

Bedeniňem oň ýanynda goýup gel. 

Bulap ur başyňdan gorkyň öýmesin, 

Uzaklardan çagyranym duýup gel. 

 

Didaryňdan ganyp içsin dideler, 

Gülkilermiz heň goşsun bagt sazyna. 

Seň ýanyňda argyn ruhum ýigdeler, 

Göwnüm güllär jilwe, oýun-bazyňa. 

 

Gurum basan sözler ýatyr içimde, 

Gulaklarňa eşitdirmän sözläýin. 

Kalbymyzam tikilen bir biçimde, 

Hoş roýuny gözlerime dözmänim. 

 

Yhlasdyr damjadan deňiz döreden, 

«Nesip etmez – diýme – arzyly bahar». 

Duşuşyk soňlanar ajap ömre deň, 

Daňyň düýbi çyzylanda her säher. 

 

Güneş gözlerimi dyrmalap açýar, 

Men-ä oýanmasam, senem gitmäýseň. 

Düýşlerimem saňa garaşyp geçýär, 

Tapyşaly meýlisinde Gipnosyň. 

 

© Süleýman TEKÄÝEW