Eger men gidäýsem seniň dünýäňden!

Eger men gidäýsem seniň dünýäňden!

Bilýän hemmeje zat bolar başgaça.

Yhlasly el bilen ýazan hatlarym,

Kitabyň gatynda galar basmaça.

Söýmekden geçerin, ýiter ynamym,

Heňňamlar boş duýga atanda hallan.

Güneş deý gözlerme inen bulutlar,

Gylyç deý buzlary kirpikden sallar.

Güýz kimin saralyp, gyş deý sowamsoň,

Jansyz tebigata agyrtman nebsim.

Yşk jöwzasyn salyp üşän ýüregme,

Otly köz basaryn damarna tomsuň.

Tüweleý, harasat, ýyldyrym näme?

Yşgyň hasratyndan gazamsoň umman.

Özümi heläkläp ölmerin ýöne,

Ölen duýgularmy bilmerin gömmän.

Şoň üçin gitmäýin seniň dünýäňden,

Suw içen kesek deý galaýyn lagşap.

Men sessiz ýataryn daban astynda,

Ýiten aýakyzlaň tozuny ogşap...

Zehin ÇARYÝEWA