“GOWY GYZLARYMYZ BARDY...”

“GOWY GYZLARYMYZ BARDY...”

Gowy gyzlarymyz bardy,

Durna dek uçup gitdiler.

Päk, utanjaň, sadadylar,

Söýmäge ejap etdiler.

Boz durnalar, ak durnalar

Haýsy menzile ýetdiler?

Sapakda ýatkeşdi olar,

Bizi welin unutdylar.

Görýäs ýolda-yzda käte

Tötänden duşan çaglary.

Biz obanyň bilbilleri

Bezedi özge baglary.

Göwünleri ak pamykdy,

Özleri dogan Aýdylar.

Ýa-ha bizi söýmediler,

Ýa bizi dogan saýdylar...

✏️ Ahmet GURBANNEPESOW

SAÇLY GYZLAR

Bizem geldik tomaşaňa,

Uzyn-uzyn saçly gyzlar.

Gaşlary elwan boýagly,

Apy ýylan saçly gyzlar.

Gider-gider öz iline,

Men gurban inçe biline,

Çykarlar bagyň seýline,

Eli totuguşly gyzlar.

Aýaklary terbiýetli,

Gollary elwan boýagly,

Uzyn boýly, al ýaňakly,

Gyýma galam gaşly gyzlar.

Aşyk Oraz diýer, näzlim,

Köli ördek, guba gazlym,

Bal bilen şeker agyzlym,

Göwher hünji dişli gyzlar.

✍️ Aşyky (Aşyk Oraz)