Italmaz AKMYRADOW
Indi on sekize ýetendir ýaşyň,
Oglum oňatja gyz gözüňde bolsun.
Möjegiň çeni däl seniň ys alşyň,
Oglum oňatja gyz gözüňde bolsun.
Gözläber inerim bir gün taparsyň,
Goý meniň hoş sözüm göwnüň aparsyn.
Aýalyň duşmasa basym çökersiň,
Oglum oňatja gyz gözüňde bolsun.
Aşdan bölüp alsaň ýene aş bolar,
Ejesi şerraýy, gyzy kaş bolar,
Ýagşy ýigdiň ýary göwündeş bolar,
Oglum oňatja gyz göwnüňde bolsun.
Şemal ýaly çar tarapdan öwüsmesin,
Aýbymyz kän, ýüzümize basmasyn.
Goňşy bilen gatnaşygy kesmesin,
Oglum oňatja gyz gözüňde bolsun.
Spirtli zatlardan içýän bolmasyn,
Köplükde kellesi göçýän bolmasyn,
Daşy altyn sary içýän bolmasyn,
Oglum oňatja gyz gözüňde bolsun.
Iki sany ýigdiň güli bolmasyn,
Gyzyl köz ýaly dili bolmasyn,Göwni biziňkiden uly bolmasyn,
Oglum oňatja gyz gözüňde bolsun.
Elli ýaşda kän zat bize aýandyr,
Ol seniň namysyň, uýat-haýaňdyr,
Her adamy adam edýän aýaldyr,
Oglum oňatja gyz gözüňde bolsun.Adam pahyr öter ýüz müň ötükden,
Ötmek kyndyr agyr günden, çatykdan,
Çakylyk gelmesin süýtden, gatykdan,
Oglum oňatja gyz gözüňde bolsun.
Ile meňzeş bolsaň ýüzüň utanmaz,
Ata-babaň eýer alman at almaz,
Ejeň Jumasoltan, kakaň Italmaz,
Oglum oňatja gyz gözüňde bolsun.Ýeke dälsiň, ýakynyň bar, daşyň bar,
Aýlanmaga Ýolöteniň, Guşgyň bar,
Aýdyp bersem dört çemodan goşgym bar,
Oglum oňatja gyz gözüňde bolsun.
Italmaz AKMYRADOW

Teswirler (1)
Teswir ýazmak üçin hasabyňyza giriň