«Sergä» çakylyk

Gyş ýollara düşäp haly
Ýör, ine.
Hemmäni çagyrýan ýaly
Törüne.

Goýupdyr ol, «sergi» gurap
Töründen.
Penjirä çekipdir surat
Görünmän.

Çagalaryň gar adamy
Heýkel deý.
Çagyryp ýör bar adamy:
«Heý, gel, heý!».

Meniň kömegim

Ejem hamyr ýugranda,
Menem hamyr ýugruşdym.
Ejem igin egrende,
Menem igin egrişdim.

Ejem paçak dogranda,
Menem paçak dograşdym.
Ejem balyk gowranda,
Menem balyk gowruşdym.

Ejem keçe kakanda,
Menem keçe kakyşdym.
Ejem çörek ýapanda,
Menem çörek ýapyşdym.

Entek ýaşym kiçijik,
Ýaňja gitdim üçüme.
Bilýäňizmi, men niçik
Kömekleşýän ejeme?

Bilýäňizmi, nähili
Munça işi bitirýän?
Ejem işlän mahaly
Akyllyja oturýan.

Eremeýän gar

Geçen gyşda gar ýagdy
Jaýlaryň çür başyna,
Baglaryň çür başyna,
Daglaryň çür başyna.


Geçen gyşda gar ýagdy
Kakam janyň saçyna.

Günüň nury saçyla,
Eredi jaýlaň gary,
Eredi baglaň gary,
Eredi daglaň gary.
Ýöne weli kakamyň
Saçyna ýagan ak gar
Eränok şondan bäri.

Bäbejik

«Iş etjek men, beriň iňňe»
Diýýän ýaly, görüň, ine.
Aglap otyr Sonaň jigsi:
«Iňňä-iňňä, iňňä-iňňä».

Ýöne oňa diýýär Sona:
«Aýt, hany, eýjejigim,

Sanawajyň dowamyny
Bileňokmy, eýse, jigim?

Onda diňle, aýdýan barsyn,
Meň yzymdan gaýtalarsyň!

«Iňňe-iňňe, ujy diňňe,
Bal-balyna, şek-şekine...».

Emma bäbek diýdi diňe:
«Iňňä-iňňä, iňňä-iňňä».

Sona ýene gaýtalady
Sanawajy başdan-aýak.
Soňra diýdi: «Eýjejigim,
Aýtsaň gerek yzyn ind-ä».
Gaýtalady bäbek ýene
Şol bilýänje sözün diňe:
«Iňňä-iňňä, iňňä-iňňä».

Guldurdy SÄHETDURDYÝEW.