Ümsümlige tussag edilen bilbil,

Saýraman oňup ýör çäresizlikden.

Sözlerniň şekilin çekýär elleri,

Derdini aňladýar sessiz sözlükde.

~

Taýýarlyksyz bu synaga girse-de,

Doglup zulmat içre gözlerin açyp.

Käte ýakyn-ýady ondan irse-de,

Nätsin ýazgydyny almandy seçip.

~

Dodagyňdan okap bilýär diýýäniň,

Aňýar ol köpleriň üstünden gülşün.

Hemmä, synagdygny goja dünýäniň,

Kakabaş jahyllar nireden bilsin?!

~

Gursagnyň göwheri görünmez göze,

Ýalňyzlyk köýnegniň etegin ezýär.

Dünýä sorag bilen seredýän ýüze,

Näbelli ýylgyrşy nur çaýyp gezýär.

~

Sözleşmek, eşitmek ýönekeýje zat,

Bize sagbolsuna berilen ýaly.

Seniň üçin bolsa bar zatdan zyýat,

Gursakda garramaz arzuw mysaly.

~

Köp zatlardan mahrum edipdir ykbal,

Gaýgy-gussaň gözleriňde jemlenen.

Seň kalbyň gürleýär, meň bolsa dilim,

Näler dertleşesim gelýär seň bilen,

Hasratyň aýtmaga, wah, ýüregim lal.

✍🏻 .Süleýman .Tekäýew.