Hol-ha Gün oýandy, oýandy goja,
Ördi çagajyklar, ak saçly eje.
Balarylar gerinipjik oýandy,
Däli şemal yranypjyk oýandy.
Serçejik oýandy garnyny sypap,
Baglary oýardy ýüzüni ýelpäp,
Güllerem oýandy owkalap gözün,
Pişikler oýandy suw sepip ýüze.
Goýunlar mäleşip-mäleşip turdy,
Sygyrlar uzyndan molaşyp turdy.
Äwmezek gazlaram oýandy pallap,
Gumry gondy telärmize pel-pelläp.
Horazlar gygyrdy “Turuň” diýýäň deý,
Eziz obam, oýanşyňy söýýän, heý!
Ýalta köpegmizem turdy iň soňky,
Gije-de ýatmandyr, iň kyny şoňky.
Leýlisaçlar saçlaryny darady,
Salamly söwütler başyn yrady.
Jykyr-jykyr edip çeşme oýandy,
Otlarda çyg Gün düşdi-de oýandy.
Her kişi öz aýdymyna başlady,
Janypkeş Gün şat säheri buşlady.
Ýaňlanýar bu ýerde säher aýdymy,
Ýerine ýetirýär: mähriban obam.
Derýaň suwly, dagyň baýyrly bolsun,
Ör, obam, ertiriň haýyrly bolsun!
@Suraý Babanyýazowa

Teswirler (15)
Teswir ýazmak üçin hasabyňyza giriň