Offset çap usuly — 6-njy jemleýji bölüm.

«Offset çap usuly» atly makalalar tapgyrynyň iň soňky bölüminde çaphanada ulanylýan esasy enjamlara we olaryň ýerine ýetirýän işlerine ser salarys.

WAJYP DUÝDURYŞ: Agzalýan kärhanalardyr, öndürijler we maşyn modelleri diňe mysal hökmünde görkezilýär, mahabat maksadyny göz öňünde tutmaýar. Beýleki öndürijileriň we modelleriň hem bardygyny, enjam saýlanylanda tehniki talaplaryň göz öňünde tutulmalydygyny ýatladýarys.

1. Offset çap maşynlary

Offset çap önümçiliginiň esasy enjamy çap maşynydyr. Ol taýýarlanan dizaýny kagyza ýa-da degişli list görnüşindäki materiala geçirýär.

Heidelberg Speedmaster — bu ugurda giňden tanalýan maşynlaryň biridir. Onuň dürli modelleri bar:

Heidelberg Speedmaster SM 52

Heidelberg Speedmaster SM 74

Heidelberg Speedmaster SM 102

Heidelberg Speedmaster CD 102

Heidelberg Speedmaster XL 75

Heidelberg Speedmaster XL 106

Mundan başga-da, Komori Lithrone, Ryobi 750 we Mitsubishi Diamond ýaly ofset çap maşynlary hem ulanylýar.

Maşynlaryň ölçegi, reňk bölümleriniň sany we mümkinçilikleri dürli-dürlüdir. Haýsy maşynyň saýlanmagy öndüriljek önüme we çaphananyň iş möçberine baglydyr.

2. Wysyçka stanoklary

Çap edilen kartony ýa-da kagyzy diňe göni çyzyk boýunça kesmek bilen çäklenmän, oňa ýörite şekil bermek hem zerur bolup biler. Şeýle ýagdaýlarda wysyçka stanoklary ulanylýar.

Mysal üçin, karton gutular, ýörite şekilli etiketkalar we dürli görnüşli gaplamalar degişli pyçakly galyp arkaly kesilýär.

Bu ugurda belli maşynlar:

Original Heidelberg Cylinder KSB

Original Heidelberg Cylinder SBB

Original Heidelberg Cylinder SBD

BOBST Autoplatine

BOBST NOVACUT

BOBST SP

Bu maşynlaryň gurluşy we mümkinçilikleri biri-birinden tapawutlanýar. Olaryň esasy wezipesi bolsa önümi taýýarlanan galyp boýunça kesmekdir.

3. Folga basma maşynlary

Käbir çap önümlerinde diňe reňkli şekil ýeterlik bolmaýar. Marka adynyň, logotipiň ýa-da bezeg elementiniň altyn, kümüş öwüşgininde görünmegi önümiň daşky görnüşini has özüne çekiji edip biler.

Şeýle bezeg üçin folga basma maşynlary ulanylýar.

Mysal modeller:

Original Heidelberg SBG

Original Heidelberg GTP

MK Masterwork Ecofoil 106 FC

MK Masterwork Easymatrix 106 FC

Folga basma esasan karton gutularda, sowgat gaplamalarynda, çakylyklarda we dürli bezegli etiketkalarda ulanylýar. Käbir maşynlar diňe folga basmak üçin, beýlekileri bolsa goşmaça kesim işleri üçin hem niýetlenendir.

4. Karton gutulary ýelimleýän maşynlar

Karton gutynyň çap edilmegi we kesilmegi onuň doly taýýar bolandygyny aňlatmaýar. Gutynyň degişli bölekleri eplenip, ýelimlenmelidir.

Bu işleri ýerine ýetirýän enjamlara folder-gluer, ýagny epleme-ýelimleme maşynlary diýilýär.

Belli modelleriň käbirleri:

BOBST NOVAFOLD

BOBST EXPERTFOLD

BOBST MASTERFOLD

Heidelberg Diana

Vega folder-gluer

Bu maşynlar ýasy karton böleklerini taýýar gutulara öwürmäge kömek edýär. Olar azyk önümleriniň, kosmetik serişdeleriň, dermanlaryň we beýleki harytlaryň gaplamalaryny öndürmekde möhüm orun tutýar.

5. Laminasiýa maşynlary

Laminasiýa çap edilen kagyzyň ýa-da kartonyň ýüzüne inçe gorag plyonkasyny ýelmemek üçin ulanylýar. Ol önüme mat ýa-da ýalpyldawuk görnüş berip, ýüzüni sürtülmeden goramaga kömek edýär.

Mysal modeller:

Foliant VEGA

Foliant KOBRA

Komfi AMIGA

Komfi JUNIOR

Autobond Mini

Laminasiýa wizitkalarda, kitap gapaklarynda, karton gutularda we dürli mahabat önümlerinde ulanylýar.

6. Göni kesýän maşynlar — «резка»

Çaphanada iň köp ulanylýan enjamlaryň biri hem kagyzy göni çyzyk boýunça kesýän maşyndyr. Ol uly listleri gerekli ölçegde kesmäge mümkinçilik berýär.

Mysal modeller:

POLAR 78

POLAR 92

POLAR 115

POLAR 137

Wohlenberg 115

Perfecta 92

Bu maşynlar wizitkalary, kitap sahypalaryny, plakatlary we beýleki gönüburçly önümleri kesmek üçin ulanylýar.

Göni kesýän maşyn bilen wysyçkanyň tapawudyny ýatda saklamak möhümdir: birinjisi göni kesim edýär, ikinjisi bolsa ýörite galyp arkaly dürli şekilleri kesýär.

7. Epleme maşynlary

Žurnallary, bukletleri we kitapçalary taýýarlamakda kagyzy dogry tertipde eplemek zerur bolýar. Bu iş ýörite epleme maşynlarynda ýerine ýetirilýär.

Mysal modeller:

Heidelberg Stahlfolder TH 82

Heidelberg Stahlfolder KH 82

Heidelberg Stahlfolder TX 96

MBO T50

MBO K8

Horizon AFC-566

Bu enjamlaryň dürli görnüşleri bar. Käbirleri kiçi göwrümli işlere, beýlekileri bolsa uly önümçilikde ýokary tizlikde işlemäge niýetlenendir.

8. Laklama enjamlary

Laklama çap edilen önümiň ýüzüne ýörite lak gatlagyny çalmak üçin ulanylýar. Ol önüme goşmaça bezeg berip, käbir ýagdaýlarda ýüzüniň goragyny hem güýçlendirýär.

Laklama aýratyn enjamda ýerine ýetirilip bilner ýa-da çap maşynynyň degişli bölümi arkaly amala aşyrylyp bilner.

Mysal hökmünde Heidelberg Speedmaster maşynlarynyň laklama bölümlerini we degişli laklama ulgamlaryny görkezmek bolar.

Ofset çap usuly boýunça nämeleri öwrendik?

Hormatly okyjylar, «Offset çap usuly» makalalar tapgyrymyzyň dowamynda offset çap önümçiliginiň esasy tapgyrlaryna ser saldyk.

Biz:

offset çap usulynyň nämedigini we onuň nähili işleýändigini;

çap maşynynyň esasy böleklerini;

CMYK reňk ulgamyny we dizaýny çap üçin taýýarlamagy;

wysyçka, pyçakly galyp we önüme gerekli şekili bermek işlerini; laminasiýa, folga basma, laklama we ýelimleme ýaly çapdan soňky işleri;

çaphanada ulanylýan esasy maşynlaryň atlaryny we modellerini öwrendik.

Elbetde, offset çapçylygy örän giň ugur. Operatorlar işiň dowamynda reňkleri sazlamak, kagyzyň aýratynlyklaryny saýlamak, maşynlary sazlamak we önümçilikdäki näsazlyklary aradan aýyrmak ýaly köp sanly inçe meseleleri öwrenýärler. Emma bu makalalar tapgyry size offset çap usulyna düşünmek we çaphanada ýerine ýetirilýän işleriň umumy tertibini bilmek üçin başlangyç bolmaga kömek edendir diýip umyt edýäris.

Her bir taýýar çap önüminiň aňyrsynda diňe bir maşyn däl, eýsem dizaýneriň, çapçynyň we önümçiligiň beýleki operatorlarynyň bilelikdäki zähmeti durýar.

INDIKI TAPGYRDA NÄME ÖWRENERIS?

Ofset çap usuly bilen tanyşlygymyzy şu bölüm bilen jemleýäris. Ýöne çap önümçiliginiň dünýäsi munuň bilen tamamlanmaýar.

Indiki tapgyrymyzda fleksiýa çap usuly bilen tanyşarys! Onuň nähili işleýändigini, haýsy enjamlaryň ulanylýandygyny, nähili önümler üçin amatlydygyny we offset çapdan näme bilen tapawutlanýandygyny ädimme-ädim öwrenmäge başlarys.

Täze tapgyrymyzda hem biziň bilen boluň. Çap önümçiliginiň gyzykly dünýäsini bilelikde öwrenmegi dowam edeliň!

Saparmyrat Gürgençli