SIZE GATY GYNANMAGAM, BEGENMEGEM BOLANOK

‎

‎― Size gaty gynanmagam,

‎begenmegem bolanok…

‎(Doktor halky zabun halk. Eglişigi

‎bilenok.)

‎Ýüregňize dynç beriň, tolgunara haly ýok,

‎Ýaşamak isleseňiz, şundan başga ýoly ýok!

‎

‎Begenmän, gynanman, ýatmaly ýyllar…

‎Ýazlar, gyşlar, güýzler…

‎Gyzlar, ogullar,

‎Bilbiller,

‎Ter güller,

‎Parlak ýyldyzlar,

‎Asuda agşamlar,

‎Gohly gündizler,

‎Perwana,

‎Gurbaga,

‎Hatda garynja ―

‎Hiç bir zat goýmaly däl meni ünjä.

‎Hiç bir zat göwnümi göge göterip,

‎Ýüregime ganat baglamaly däl,

‎Hiç bir zat başymy gussa batyryp,

‎Hiç bir zat kalbymy daglamaly däl,

‎Hiç bir zada gülmeli,

‎aglamaly däl…

‎

‎― Londonda bir günde togsan üç çaga

‎Ajyndan ölüpmiş…

‎― Meniň işim däl!

‎― Maýadarlar nany derýa döküpmiş…

‎― Dökse dökübersin, meniň aşym däl!

‎

‎― Tel-Awiwiň «gyrgylarnyň» astynda

‎Eneler dat edýär…

‎― Etse, goýar-da!..

‎― Ýapon işçileri çykypdyr ýene

‎«Bahar marşyna»!

‎― Ne işim bar o ýerde!

‎

‎― Buşluk! Goňşyň ekiz ogly bolupdyr!

‎― Çagadyr-da güni gelse, dogar-da!

‎― Bize gelýän süýtçi daýza ölüpdir…

‎― Ajaldyr-da, golaý gelse, alar-da!

‎

‎Şatlykmy,

‎guwançmy,

‎gazapmy,

‎ezýet,

‎«Soňky habarlarmy»,

‎žurnalmy gazet, ―

‎Aýyrdym olaryň baryn bir ýana,

‎Kast edip bolarmy heý, şirin jana!

‎

‎Ine, doktor, aýdanňyzy bitirdim,

‎Begenmän, gynanman bir gün oturdym

‎Asyl hiç dermana bolmadym men zar,

‎Ýöne indi sizden bir haýyşym bar:

‎Haýwanat bagyna eltiň-de göni,

‎Maýmynlaň içinde oturdyň meni!

‎

‎‎Annaberdi AGABAÝEW