Annasoltan KEKILOWA
Söýemok men bu jahanda,
Ýaranjaklap gün görmäni.
Ýagşy görýän beýle günden,
Öz ajalma jan bermäni.
Niçik bolar şemal ýaly,
Çar tarapa öwsüp dursam?
Ýan bermeli bolar onda,
Garşymda gaý-tupan görsem.
Dönmerin öz pikirimden,
Atsalarda ýanar oda.
Ömrüm boýy hyzmat etjek.
YNSAN diýlen belent ada!
Perzent
Oglum Ýagmyra bagyşlaýaryn.
Owadan-la bu jaý!
Gözel-le bu jaý!
Bu jaý hormat bilen
Söýgüden doly
Munda ogul bolýar,
Gyz dünýä inýär.
Bu jaý geljek nesliň
Simwoly ýaly.
Akuşerka daýza,
Meniň çagamy
Getirsene bäri,
Göremok häli.
Getirdiňmi? Sag bol,
Mähriban daýza.
Hany, meniň gujagyma bersene!
Tolgunýar ýüregim,
Joşýar ýüregim,
Oň gürsüldäp urşuny bir görsene!
Salam!
Dünýä inen ýaşajyk çaga!
Enelik orjuny bagyş etdiň maňa.
Ýagşy küýseýşi dek
Ene topragyň
Küýsäpdim,
Şonuň üçin
Ýagmyr diýen ady dakýaryn saňa.
Enelik borjuny ederin berjaý—
Ýelden, ykdan gorap saklaryn seni,
Göwsümde ulalyp kemala gelseň.
Jahyl çykyp, begendirseň sen meni,
Şonda-da ýatlaryn bu gözel jaýy,
Seni söýüşim dek söýerin muny.
Açyk bolsun baky,
Ýaşasyn baky
Çagalaryň dünýä inýän mesgeni?
Annasoltan KEKILOWA

Teswirler (2)
Teswir ýazmak üçin hasabyňyza giriň