Durmuş sapagyndan,

Üçlük alamda,

Gündelikde duran,

Bäşden utandym.

​Sähelçe zat üçin,

Şarpyk iýemde,

Mähir görýän,

Deňi - duşdan utandym.

​Ýüzümden alanda,

Dost ýar diýenim.

Namysdan,

Burnumdan geldi iýenim.

​Pulsuz görüp

Taşlan wagty söýenim,

Halal, gara zähmet,

İşden utandym.

​Ýalňyşyp dost diýdim

Birgiden töňňä,

Manady kän görüp

Satdylar teňňä.

​Güler ýüz berseler,

Ynanyp hemmä,

Gözlerimden akan

Ýaşdan utandym.

​Sany-sajagy ýokdur,

Eden hatamyň,

Gysga ýaşda,

Ýazdym durmuş kitabyn.

​Kalbyn ynjydamda,

Enem-atamyň,

Dil saklap bilmedik,

Dişden utandym.

​Gynansakda

Bir gün tutular ýasyň.

Geçer Allam,

Biz bendeleň günäsin.

​Bilmän eden wagtyň,

Gözüň zynasyn,

Meň tarapym çalşan,

Gaşdan utandym.

Kuwwat ÝAZMUHAMMEDOW