Dert-gussalam gursagyma sygmasa,
Keçjal men-menligim, boýun egmese,
Atan okum dürs nyşana degmese,
Käte içim döküp ýeňläsim gelýär,
Ýagyş meniň saňa, meňzäsim gelýär.
◇
Durmuş dertlerinden ýagyr bolamda,
Gam-gussadan saralamda-solamda,
Köteklenip öz-özümden doýamda,
Dünýä sygman zaryn eňräsim gelýär,
Ýagyş meniň saňa, meňzäsim gelýär.
◇
Elimden gidirip ilki söýenim
Çekip ýörün diriligiň ölümin,
Şoňa bitýän bolsa sowrup jigerim,
Şol söýgüm kalbymda, egläsim gelýär,
Ýagyş meniň saňa, meňzäsim gelýär.
◇
Asmany ýandyryp, zemini suwlap,
Şonda gussalarym kemelse ýeňläp,
Dälirän dek, iki tarapym deňläp,
Bagtsyz, bagtly ömrüm soňlasym gelýär,
Ýagyş meniň saňa, meňzäsim gelýär...
◇
Şageldi SALYHOW

Teswirler (2)
Teswir ýazmak üçin hasabyňyza giriň