Hümmetlidir tagam-duzuň,

Zenan bagtyýar bolanda.

Hormat goýar ogul-gyzyň,

Zenan bagtyýar bolanda.

 

Dünýäňi ala-ýaz eýlär,

Göwün guşuň perwaz eýlär,

Aýdym aýdar, şygyr söýlär,

Zenan bagtyýar bolanda.

 

Tygşytlar owkat-azygyň,

Bagyşlar ähli ýazygyň,

Bagt guşuň gitmez tazygyp,

Zenan bagtyýar bolanda.

 

Gara gözleri sürmeli,

Söýüp hem söýlüp ýörmeli,

Artar barar görk-görmegi,

Zenan bagtyýar bolanda.

 

Duýarsyň özüň «Görogly»,

Halal ojagyň gorogly,

Azatsyň sowal-soragdan,

Zenan bagtyýar bolanda.

 

Niýet-päliň sözden çaklar,

Ahwalyňy gözden çaklar,

Söýgiňi iki esse haklar,

Zenan bagtyýar bolanda.

 

Öý – ýerbe-ýer, tämiz – howly,

Şähdiň – açyk, işiň – şowly,

Bolar mydam seňki dogry,

Zenan bagtyýar bolanda.

 

Haly – Älem,

Älem – haly,

Nepis barmy zenan ýaly?!

Çyn eýlär gözel hyýaly,

Zenan bagtyýar bolanda.

 

 

Güler ýüzi misli kamar,

Ýerin bilip sözlär, dymar,

Kem-käslerňe gözün ýumar,

Zenan bagtyýar bolanda.

 

Zenan bilen juwan dünýä,

Her bir işde çeper, sünnä,

Sözlemeseňem düşünýä,

Zenan bagtyýar bolanda.

 

Ýurt – parahat, durmuş – ajap,

Çöreklidir tamdyr, saçak,

Üwrelip durar sallançak,

Zenan bagtyýar bolanda.

Gurbanjemal Annakowa